लैङ्गिक हिंसा रोकथाम गर्न सञ्जालको बैठक

उहाँले लैङ्गिक समानता र सामाजिक समावेशीकरण अझै चुनौतीपूर्ण विषयका रूपमा रहेको उल्लेख गर्दै यस क्षेत्रमा भइरहेका प्रयासलाई थप प्रभावकारी बनाउन राज्यका निकाय तथा नागरिक समाज संस्थाहरूको सक्रिय भूमिका आवश्यक रहेको धारणा राख्नुभयो।

उहाँले २०८२ माघ २६ गते सम्पन्न अघिल्लो बैठकका निर्णयहरूको कार्यान्वयन अवस्थाबारे समीक्षा गरिएको जानकारी दिनुभयो। निर्णय कार्यान्वयनको प्रगति, उपलब्धि तथा कार्यान्वयनका क्रममा देखिएका चुनौतीबारे विस्तृत छलफल भएको उहाँको भनाइ थियो।

लैङ्गिक हिंसा रोकथामका लागि कानुनी व्यवस्था मात्र पर्याप्त नहुने बताउँदै समुदायस्तरमै व्यवहार परिवर्तन आवश्यक रहेको नगरपालिकाका उपप्रमुख तप्ता थापाले उल्लेख गर्नुभयो। उहाँले महिला तथा बालिकाले सम्मान, सुरक्षा र समान अवसर प्राप्त गर्ने वातावरण निर्माणका लागि सबै सरोकारवाला पक्ष एकजुट भएर अघि बढ्नुपर्नेमा जोड दिनुभयो।

बैठकमा लैङ्गिक हिंसा निवारण कोषको परिचालन सम्बन्धमा समेत विस्तृत छलफल गरिएको थियो। कोषको प्रभावकारी उपयोग, लक्षित वर्गसम्म पहुँच अभिवृद्धि तथा आगामी कार्ययोजनाबारे आवश्यक सुझाव र निर्णयहरू गरिएको जनाइएको छ।

त्यसैगरी, चालु आर्थिक वर्षमा सञ्चालन भइरहेका लैङ्गिक हिंसा रोकथाम तथा प्रतिकार्यसम्बन्धी कार्यक्रम र लैङ्गिक समानता प्रवर्द्धनका लागि गरिएका विभिन्न क्रियाकलापहरूको समीक्षा गरिएको थियो। कार्यक्रममा सहभागीहरूले सञ्जाललाई थप सक्रिय र प्रभावकारी बनाउने, सम्बन्धित निकायहरूबीच नियमित समन्वय र सहकार्य बढाउने तथा हिंसाविरुद्ध सामूहिक अभियान सञ्चालन गर्ने विषयमा समेत जोड दिएका थिए।

कार्यक्रममा नगरपालिकाका जनप्रतिनिधि, सुरक्षा निकायका प्रतिनिधि, विभिन्न सरकारी तथा गैरसरकारी संस्थाका प्रतिनिधि, महिला अधिकारकर्मी तथा  सरोकारवालाहरूको सहभागिता रहेको थियो।