दैलेख, जेठ २५ गते । दैलेखको नारायण नगरपालिका–६ काडाचौरस्थित श्री फूलबारी विद्या मन्दिर प्रालिले अभिभावक भेला तथा शैक्षिक अन्तरक्रिया कार्यक्रम गरेको छ। विद्यालय र अभिभावकबीच समन्वय तथा शैक्षिक गुणस्तर अभिवृद्धि गर्ने उद्देश्यले अभिभावक भेला तथा शैक्षिक अन्तरक्रिया भेला गरिएको हो ।
कार्यक्रममा विद्यालयका गतिविधि, विद्यार्थीको प्रगति तथा आगामी योजनाबारे जानकारी गराइएको विद्यालयका प्रधानाध्यापक सुवास कुमार थापाले बताउनुभयो । उहाँले विद्यालय र अभिभावकबीचको सहकार्यले विद्यार्थीको समग्र विकासमा महत्वपूर्ण योगदान पुग्ने बताउनुभयो।
नारायण नगरपालिका शिक्षा शाखाका शिक्षा अधिकृत सूर्यलाल पाण्डेले विद्यालयले गुणस्तरीय शिक्षा प्रदान गर्दै आएको उल्लेख गर्दै शैक्षिक गुणस्तर सुधारका लागि अभिभावकको सक्रिय सहभागिता र सामुदायिक सहकार्य आवश्यक रहेको बताउनुभयो। कार्यक्रममा विद्यालय सुधार योजना निर्माणका लागि अभिभावक तथा सरोकारवालाबाट राय–सुझाव संकलन गरिएको विद्यालयले जनाएको छ।
विद्यालयको शैक्षिक विकास र व्यवस्थापनलाई थप प्रभावकारी बनाउन यस्ता कार्यक्रम उपयोगी हुने सहभागीहरूले बताएका छन्। कार्यक्रममा अभिभावक, शिक्षक तथा स्थानीय सरोकारवालाको सहभागिता रहेको थियो।
प्रकाशित मिति : २०८३ जेठ २५ गते सोमबार
